КАДАСТР ПАСПОРТЫН ТАЯРЛАЎ ТӘРТИБИ
Бүгинги күнде мәмлекетимизде алып барылып атырган сиясат, әмелге асырылып атырған реформалардың барлығы халқымыз жақсы жасаўы ушын әмелге асырылмақта. Ҳәзирги кунде 130 дан аслам мәмлекетлик хызметлер көрсетилип атырған Мәмлекетлик хызметлер орайларының тийкарғы мақсети халықтың аўырын жеңил қылыў, оларды көрсетилип атырған хызметлердиң сапасынан разы қылыў есапланады.
Өзбекстан Республикасы Министрлер Кабинетиниң 2020-жыл 2-сентябрь күнги 535-санлы “Кадастр тараўында айрым мәмлекетлик хызметлерди көрсетиўдин ҳәкимшилик регламентлерин тастыйықлаў ҳаққында”ғы қарары қабыл етилген еди.
Тастыйықланған регламент бойынша енди физикалық ҳәм юридикалық шахслар көшпес мүлк объектине кадастр паспортын ислетиў ушын, көшпес мүлк объектлериниң нызам тийкарындағы ипотекасы ҳәм ипотека ҳаққындағы шәртнамаларды мәмлекетлик дизимнен өткериў ушын, көшпес мүлк объектлерин ижәраға бериў шәртнамаларын мәмлекетлик дизимнен өткериў ушын, өзгениң жер участкасынан шекленген түрде пайдаланыў ҳуқықы (сервитут) ҳаққындағы келисимди мәмлекетлик дизимнен өткериў бойынша, пуқаралардың атында шахсый турақ жай бар ямаса жоқлығы ҳаққында мағлыўматнама алыў бойынша мәмлекетлик хызметлер орайларына мүрәжат етеди ямаса Өзбекстан Республикасы Бирден-бир интерактив мәмлекетлик хызметлер порталы арқалы дизимнен өтеди.
Көшпес мүлктиң кадастр паспортында мүлкдар ямаса ҳуқық белгилеўши ҳүжжетлер ҳаққындағы мағлыўматлар көрсетилмейди.
Сондай-ақ, көшпес мүлктиң кадастр паспорты бирлемши хатлаў жумыслары орынланғанда, объекттиң бир бөлими бөлингенде ямаса жер участкасы өз алдына бөлингенде (бунда еки бөлимге өз алдына кадастр паспорты ислетиледи), аўыл хожалығына арналмаған жер участкалары меншиклестирилгеннен соң, олардың бир бөлимине болған ҳуқық басқа шахсқа өткенде, жер участкасының майданы ямаса шегара ноқатлары өзгергенде, көшпес мүлк объектиниң мәнзилин белгилеўде ямаса өзгертириўде, көшпес мүлк объектиниң типи өзгергенде ҳәм өз жер участкасында тийисли рухсатнамаларды рәсмийлестирместен қурылған имәратлар бар болған ҳалатларда рәсмийлестириледи ҳәм қайта рәсмийлестириледи.
Кадастр паспортын алыў ҳәмде белгиленген тәртипте көшпес мүлкти мәмлекетлик дизимнен өткериў ушын арза бериўшиниң қәлеўине көре бир ўақытта ямаса өз алдына мүрәжат етиў мүмкин.
 Кадастр паспортын таярлаў объекттиң қурамалылығына қарап белгиленген мүддетлерде әмелге асырылады. Көшпес мүлк объектлериниң турақ жайға тийисли бөлими бойынша, көп квартиралы үйдеги квартира – 3 жумыс күнине шекем, жеке тәртиптеги турақ жай – 5 жумыс күнине шекем;көшпес мүлк объектлериниң натурақ жайға тийисли бөлими бойынша: улыўма майданы 100 кв.м дейин – 5 жумыс күнине шекем, улыўма майданы 100 кв.м ден 1 000 кв.м дейин – 7 жумыс күнине шекем ҳәм улыўма майданы 1 000 кв.м ден артық болғанда 10 – 25 жумыс күнине шекем болған мүддетлерде әмелге асырылады.
Кадастр (йиғмажилд) паспорты жойтылғанда (жарамсыз ҳалатқа келгенде), қағаз ямаса пластик көринисте жаңа кадастр паспорты еки жумыс күни даўамында бериледи.
Сондай-ақ, сораўнамада надурыс мағлыўматлар көрсетилиўи, көшпес мүлк объектлерине болған ҳуқықларды тастыйықлаўшы ҳүжжетлердиң болмаўы, арза бериўши ямаса оның ўәкили келисилген мәнзилде болмаған жағдайда, жуўапкер орган тәрепинен кадастр паспортын рәсмийлестириў бойынша көшпес мүлк объектине қадаған ямаса хатлаў қойылғанлығы кадастр паспортын бериўди бийкар етиў ушын тийкар болады.
И.Жеңисбаев, 
Қараөзек районы МХО жетекши қәнигеси.скачать dle 12.0
Сайтқа кириў
лучший сайт где можно скачать шаблоны для dle 12.0 бесплатно